Día 4

Bos días familias! Somos o equipo técnico de monitores e monitoras que acompañamos aos vosos fillos e fillas durante esta divertida experiencia.

Como todos estes días, o primeiro que fixemos na mañá de onte foi espertarnos a ritmo de diferentes estilos musicais para empezar o día con toda a enerxía positiva do mundo! Preparámonos rapidamente para desfrutar do almorzo que nos deu toda a forza que precisabamos para afrontar todo o que tiñamos ao longo do día.

Rapidamente fomos lavar todos e todas os nosos dentes para... IRNOS Á PRAIA! Unha vez alí, e con toda a motivación, gozamos duns bailoteos que puxeron en movemento os nosos corpos. Con todo este chute de enerxía puxémonos a practicar diferentes deportes como takraw e kimball, aínda que tamén houbo tempo para que todos os nenos e nenas empregaran a súa imaxinación para elaborar as súas propias obras de arte con area.

De seguido, tocou o momento de facer un pequeno parón para comer unha peciña de froita e seguir gozando de xogos, como o coñecido “rosa dos ventos”, e dun apetecible baño na auga, ¿quente? ¿fría? Depende de a quen lle preguntemos... 

Xa tiñamos todos moita fame, polo que voltamos ao campamento para probar o delicioso xantar que nos prepara o noso equipo de cociña e que nos permite seguir a tope co que nos queda de tarde. Despois dese marabilloso xantar, lavamos os nosos dentes e baixamos para que os nenos desfruten do seu tempo de desconexión, un momento simultáneo ca Radio Marina Española’24 e cas chamadas que fixeron algúns dos pequenos e pequenas ás súas familias.

Pasado este anaquiño, deron comezo as rotacións da tarde onde os acampados e acampadas poden desfrutar das diferentes actividades que con tanto agarimo preparamos. A primeira de todas elas foi unha divertida xincana onde por grupos todos e todas os nenos se enfrontaban aos retos que o monitorado lles tiñan preparados, pero todo isto... a contra reloxo. Pero... que tiñan que superar? Pois retos onde tiñan que poñer en práctica diferentes habilidades como a puntería, para derribar varias latas; o equilibrio, para poder pasar o slack; a coordinación motriz, para poder superar un pequeno labirinto, uns cantos saltos, facer a croqueta...

Chegou a media tarde e, polo tanto, a ansiada hora da merenda, onde aproveitamos para descansar un pouco e coller un pouco máis de forza para as seguintes dinámicas. Nesta ocasión os nenos e nenas volveron a realizar diferentes actividades animadas e amenizadas polo noso equipo de monitores e monitoras: tiro con arco, xeocaptura, escalada, tirolesa... Canto desfrutamos e canta enerxía gastamos!

 

Despois de tanta actividade, onde rematamos bastante porquiños... era necesario que chegara o momento das duchas para poder prepararnos para unha noite diferente onde estivemos divididos en dous marabilloso equipos: EQUIPO AGACHADAS e EQUIPO EUROCOPA. 

Por unha banda, comezando polo primeiro equipo, o primeiro que fixemos foron uns cantos bailoteos seguidos de diferentes tipos de agochadas: agochámonos intentando que non descubriran quen estabamos en cada un dos sitios, caracterizámonos de diferentes personaxes que escolleron os nenos e nenas libremente para realizar un asalto a un castelo que nos esperaba no pavillón e, finalmente, loitamos nun atrapa a bandeira, intentado protexer cada unha das banceiras para que o equipo contrario non fora quen de atopala.

Por outra banda, seguramente tamén quereredes saber que pasou ca gran final da Eurocopa. Todo comezou cando dende o primeiro día parte dos nenos e nenas amosaron unha gran emoción e interese por ver este decisivo partido. Polo seu bo comportamento e actitude, especialmente en relación a este ámbito, non lle puidemos negar a experiencia de compartir ese momento entre os amigos e amigas. Se ben é certo, os primeiros minutos estábanse a vivir ca propia tensión dun partido ata que chegou o primeiro dos goles que, por suposto, se celebrou como nunca antes. Os minutos foron pasando, a tensión futboleira seguía no ambiente, baseado sempre no respecto cara todo o mundo, e por fin chegou o partido e a gran celebración por ese 2-1 chea de risas, bailes e choros de felicidade. 

Despois de tanto trote, bailes e risas durante todo o día, pechámolo cun conto que transmitía unha bonita mensaxe sobre as emocións propias das persoas. Un momento que permitiu que os pequenos e pequenas puideran entrar nesa tranquilidade tan necesaria antes de pechar os seus olliños.